Ish-kryeministri i Mbretërisë së Bashkuar Boris Johnson ka zhvilluar sot një vizitë të paparalajmëruar në Ukrainë. Ai u prit nga presidenti i Ukrainës Volodymyr Zelensky dhe ministra të tjerë ukrainas në Kiev.
“Unë mirëpres Boris Johnson, një mik i vërtetë i Ukrainës, në Kiev. Boris faleminderit për mbështetjen tuaj!” shkroi Zelensky në Telegram.
Më herët deputeti britanik vizitoi qytetet Bucha dhe Borodyanka, në veriperëndim të Kievit, të cilat u pushtuan nga forcat ruse në mars të vitit të kaluar.
“Vuajtjet e popullit të Ukrainës kanë vazhduar për një kohë të gjatë. E vetmja mënyrë për t’i dhënë fund kësaj lufte është që Ukraina të fitojë – dhe të fitojë sa më shpejt të jetë e mundur. Ky është momenti për të dyfishuar dhe për t’u dhënë ukrainasve të gjitha mjetet që u nevojiten për të përfunduar punën. Sa më shpejt të dështojë Putini, aq më mirë për Ukrainën dhe për të gjithë botën”, tha Johnson.
Kryeministri aktual i Mbretërisë së Bashkuar Rishi Sunak tha se “mbështeste” vizitën e zotit Johnson.
Zoti Sunak është “gjithmonë mbështetës për të gjithë kolegët që tregojnë se Mbretëria e Bashkuar është pas Ukrainës dhe do të vazhdojë t’i mbështesë ata”, tha sekretari i tij i shtypit.
Vizita e Johnson vjen pas presionit të shtuar që po u bëhet aleatëve të Ukrainës, përfshirë Gjermaninë, për të furnizuar më shumë tanke vendin e shkatërruar nga lufta dhe disa ditë pasi atij iu dha medalja “qytetar nderi i Kievit” gjatë një takimi të Forumit Ekonomik Botëror në Davos.
