KORÇË- Ben Blushi ishte në Korçë pasditen e sotme në takim me simpatizantë dhe qytetarë. Ai sfidoi hapur kyetarin e Partisë, Edi Rama, duke shkuar paralelisht me të në Korçë dhe duke shpalosur platformën e tij.
Blushi e cilësoi takimin si “një bisedë për Shqipërinë”. “S’kam ardhur për miting, por për një bisedë mes miqsh” iu drejtua Blushi mbështetësve të tij. “Fajin nuk e ka populli për gjendjen sot, por qeveria. Qeveria thotë ka punë, por shqiptarët janë dembelë. Unë nuk mund të pranoj këtë, duhet të reagojmë. Ky nuk është vendi që meritojmë. Jemi në mes të Evropës, i kemi të gjitha mundësitë. Nuk kam qëllim të ndaj partinë ku jam. Nuk më ftuan tek takimi i Ramës. Jam deputet i Elbasanit por mua s’më ftuan. Nuk me ftojnë më. Me thonë s’ke të drejtë të zgjidhesh, un s’kam hyrë në biznes privat dhe kjo parti është kthyer në një e tillë.” deklaroi Blushi.
Deputeti Ben Blushi ka ndarë në takimin e tij të sotëm në Korçë edhe pikat kryesore të platformës së tij për kryetar të PS-së.
Sakaq po sot pasdite, kryeministri Edi Rama ishte në Korçë në një takim për anëtarësime të reja në PS. “Nuk ka asnjë çudi dhe asnjë surprizë në këtë prurje të madhe, sepse ajo që Partia Socialiste po bën prej 2 vjet e gjysme në drejtimin e qeverisjes së vendit është një motiv shumë i fortë për shumë qytetarë dhe qytetare të këtij vendi pavarësisht moshave, gjinisë, krahinës që t’i bashkohen PSsë. Sepse në këto 2 vjet e gjysme, ne padyshim nuk kemi bërë gjithçka, por aq sa mjafton për të bërë çdo njeri të arsyeshëm të kuptojë që ne jemi e vetmja fuqi që mund ta çojë Shqipërinë në drejtimin e duhur”, tha më tej Rama.
