Pas largimit të Ben Blushit nga PS-ja, kanë vazhduar replikat në distancë me Kryeministrin Edi Rama.
Ky i fundit do të ndodhej në Serbi, kur Ben Blushi deklaroi zyrtarisht largimin nga PS-ja në foltoren e Parlamentit (të enjten e kaluar).
Ndërkaq, këtë të hënë Blushi ishte në studion e “Opionion” ku foli për projektin e tij politik dhe për arsyet që e çuan drejt ndarjes me Rilindjen e Edi Ramës.
Të nesermen e emisionit, Rama do të bënte një status, ku i tregonte Blushit arritjet e Rilindjes përmes një video që tregonte se ish-të përndjekur i kanë marrë dëmshpërblimet, dhe në fund shkruante “qentë le të lehin, karvani ecën përpara”. Një moto që përpara e përdorte për PD-në.
Rama ka vazhduar ironinë mbrëmjen e së martës në emisionin e Eni Vasilit, kur deklaroi se Blushi gjatë këtyre tre viteve s’ka bërë asnjë punë, por vetëm ka shkruar libra.
“Ben Blushi ka patur dy kryetarë në parti Fatos Nanon dhe mua. Me Fatos Nanon u bë nja tre herë ministër dhe s’bëri asnjë punë. Me mua s’bëri asnjë punë por bëri nja tre libra, romane. Dhe e vetmja gjë që unë do t’i sugjeroja nëse do kisha mundësi do ishte që tani që është akoma me këtë mllefin atomik ndaj PS-së, të bëjë edhe një libër tjetër, një roman sepse kur të bëjë partinë e tij s’do bëjë më as punë dhe as romane”, tha Rama.
Ndërkohë, Blushi i është përgjigjur përmes një statusi në facebook ku shkruan: “Paska folur Edi Rama per romanet e mi! Kur shkrimtaret merren me qente, qente merren me Librat!”.
