Një 25-vjeçar është proceduar penalisht nga policia e Bulqizës pasi kreu manovra të rrezikshme me automjet, duke bllokuar qarkullimin e mjeteve dhe duke ndotur ajrin.
I riu më pas postoi video në rrjetet sociale. Uniformat blu njoftojnë se 25-vjeçari është identifikuar dhe është proceduar penalisht për veprat penale “Pengim i qarkullimit të mjeteve të transportit”, “Ndotja e ajrit”.
Ai u gjobit me 60 mijë lekë të rinj, për shkelje të Kodit Rrugor, si dhe iu tërhoq leja e qarkullimit.
“Bllokoi qarkullimin e lirë të mjeteve për të kryer manovra të rrezikshme (drift) me automjet, ndoti ajrin e më pas e postoi video-n në rrjete sociale, identifikohet, kapet dhe procedohet penalisht 25-vjeçari, drejtuesi i automjetit.
Shërbimet e Komisariatit të Policisë Bulqizë në bashkëpunim me shërbimet e Policisë Rrugore, pas publikimit të një video-je në rrjetet sociale, në të cilën shfaqet një drejtues automjeti, i cili kishte bllokuar rrugën pasi po kryente manovra të rrezikshme (drift) me automjet duke shkaktuar ndotje të ajrit e duke u bërë burim aksidenti për vete dhe përdoruesit e tjerë të rrugës, falë veprimeve të shpejta dhe profesionale, si dhe falë bashkëpunimit të ngushtë me qytetarët, u bë e mundur identifikimi dhe shoqërimi i shtetasit E.N, 25 vjeç, që shfaqet në video.
Ndaj 25-vjeçarit, u referuan materialet në Prokurori dhe nisi procedimi penal për veprat penale “Pengim i qarkullimit të mjeteve të transportit”, “Ndotja e ajrit”.
Gjithashtu nga shërbimet e Policisë Rrugore u vendos masa administrative me vlerë 60 mijë lekë të rinj, për shkelje të nenit 139, pika 3, të Kodit Rrugor, si dhe iu tërhoq leja e qarkullimit”-njofton policia.
