Reshjet e denduar të dëborës kanë bllokuar prej disa orësh by pass-in e Murrizit në Rrugën e Arbrit. Janë me dhjetëra mjete autovetura dhe furgonë pasagjerësh, të bllokuara nga reshjet intensive. Policia e Dibrës ka ngritur pika kontrolli në rrethrrotullimin e Klosit duke e devijuar qarkullimin nga aksi i vjetër, Klos-Burrel-Milot.
Në aksin rrugor Tamarë-Vermosh dhe Bogë-Qafë Thorë, borëpastrueset janë në terren.
Reshjet e dëborës kanë përfshirë gjatë mbrëmjes edhe juglindjen, megjithatë akset nacionale që lidhin Korçën me Kapshticën, Pogradecin,Qafë Thanën dhe Ersekën e Leskovikun qarkullohen pa vështirësi.
Si pasojë e motit të keq me rrebeshe shiu dhe erë dy tragete në Durrës janë përplasur gjatë ankorimit, por fatmirësisht ka vetëm dëme materiale.
Edhe një anije peshkimi është fundosur në basenin e porti.
Përkeqësimi i motit dhe era e fortë ka bërë që autoritetet të ndalojnë lundrimin e mjeteve të vogla dhe atyre të peshkimit, ndërsa Kapiteneria anuloi nisjen e tragetit të mesditës nga Durrësi drejt Barit.
Në disa rrugë të Lezhës ka prezencë uji, ndërsa në disa qytete është vështirësuar qarkullimi i automjeteve.
Parashikohet që reshjet me intensitet të lartë që pritet të bien deri në orët e pasdites të rrezikojnë përmbytje në disa qytete të ultësirës perëndimore. Bashkia e Vlorës u ka bërë thirrje qytetarëve që të mos parkojnë në zonat me risk të lartë.
Reshjet e shiut do të ndërpriten në pjesën e dytë të së martës duke sjellë përmirësim të motit. Për Krishtlindje parashikohet mot i qëndrueshëm. Sa u përket temperaturave, nga e marta bien ndjeshëm. Problem do të jenë ngricat.
Pjesa e mbetur e vitit parashikohet të jetë me mot të qëndrueshëm. Nata e ndërrimit të viteve pritet të vijë me alternime kthjellimesh dhe vranësirash.
Tv Klan
