Sekretari amerikan i Shtetit, Anthony Blinken tha se Rusia mban “përgjegjësinë përfundimtare” për raketën që ra në Poloni, ku humbën jetën dy persona.
Një hetim pritet të përcaktojë se nga është lëshuar kjo raketë. Megjithatë kreu i diplomacisë amerikane thotë se sido që të jetë përfundimi i hetimeve, përgjegjësia për ngjarjen tragjike sërish mbetet e Rusisë, ndërsa shton se Ukraina ka të drejtë të mbrohet nga sulmet ruse.
“Sido që të jetë përfundimi i hetimit, ne tashmë e dimë palën që mban përgjegjësinë përfundimtare për këtë ngjarje tragjike: Rusinë,” tha Sekretari i Shtetit i SHBA nga Bangkok, përpara një samiti të liderëve të Bashkëpunimit Ekonomik Azi-Paqësor. (APEC).
“Ajo që ne shohim çdo ditë sot është se Rusia hedh raketa në Ukrainë, duke kërkuar të shkatërrojë infrastrukturën e saj kritike, duke synuar aftësinë e Ukrainës për të mbajtur dritat ndezur,” tha kreu i diplomacisë amerikane.
“Ukraina ka të drejtë të mbrojë veten dhe ne jemi të përkushtuar të mbështesim Ukrainën”, shtoi ai.
Anthony Blinken përsëriti se Shtetet e Bashkuara “nuk kanë parë asgjë për të kundërshtuar” rastin e paraqitur nga Varshava, sipas të cilit raketa ka të ngjarë të ketë ardhur nga mbrojtja ajrore e Ukrainës.
Ministri i Jashtëm, i cili u takua gjatë ditës me homologun e tij ukrainas Dmitry Kuleba, tha se Uashingtoni vazhdon të vlerësojë situatën dhe të ndajë informacione të reja në lidhje me incidentin me Kievin./Opinion.al
