Kamera e Televizionit Klan dhe emisionit “Opinion” hyri në Damask këtë të shtunë. Gazetari Blendi Fevziu këtë herë na përcolli pamjet nga “zemra” e Damaskut, nga qyteti i vjetër.
“Jam duke të folur nga “zemra” e Damaskut, nga qyteti i vjetër, i cili është absolutisht një qytet i mrekullueshëm. Në momentin e parë dukej që ka shqetësim sepse ka shumë njerëz të armatosur rrugës dhe nuk duket se ka polici ose rregulla të tjera, por deri tani qetësia ngjan absolute”, tha Fevziu në një lidhje për edicionin e lajmeve të Tv Klan.
Ai nuk ishte vetëm, por me Arianit Shehun, Drejtor Ekzekutiv i Qendrës Amerikane për Luftën Kundër Terrorizmit, i cili është në një mision në Siri. Eksperti i marrëdhënieve ndërkombëtare tha shkurtimisht tre sfida kryesore të Sirisë sot.
Arianit Shehu: Pengimi i ripërtërirjes së ISIS-it, i grupeve terroriste, qeverisja inklusive, e cila do të përfaqësojë të gjitha grupet etnike dhe religjoze dhe krijimi i institucioneve që janë të përgjegjshme ndaj qytetarëve të Sirisë.
Blendi Fevziu: Qetësia është më e madhe se ajo që ne prisnim apo jo?
Arianit Shehu: Është qetësi dhe siguria është në nivel, mirëpo duhet të jemi të vëmendshëm sepse gjithçka mund të jetë sipërfaqësore.
Fevziu raportoi nga qyteti i vjetër i Damaskut se ka parë një jetë kulturore që rrallë e sheh.
“Është një qytet i jashtëzakonshëm jua them. Janë një ndër njerëzit më mikpritës që unë kam parë ndonjëherë në jetën time dhe njëkohësisht në pamje të parë jeta është krejtësisht normale. Dua të them që në atë kafen përballë ku ne ishim ulur deri tani njerëzit që pinë kafe, vjen një person dhe lexon “1001 netët” për klientët e kafes. Rrallë sheh një jetë kulturore të tillë”, tha Fevziu.
