Donald Trump ka reaguar pas përfundimit të bisedimeve SHBA Ukrainë në Arabinë Saudite, bisedime të cilat rezultuan të suksesshme siç deklaruan të dy palët.
Trump ka thënë se SHBA-të do të takohen me Rusinë shumë shpejt. Presidenti amerikan konfirmoi gjithashtu se do të ftonte Volodymyr Zelenskyy përsëri në Shtëpinë e Bardhë, duke shtuar: “ne duam ta mbyllim luftën në Ukrainë”.
Ukraina ka pranuar propozimin e SHBA për një armëpushim 30-ditor me Rusinë, pas më shumë se 3 vitesh nga nisja e konfliktit.
Presidenti Volodymyr Zelensky ka dhënë dakordësinë e tij për këtë armëpushim të propozuar nga Uashingtoni pas takimit të mbajtur për mbi 9 orë në Arabinë Saudite, mes një delegacioni ukrainas dhe atij amerikan.
Si rrjedhojë, Shtetet e Bashkuara kanë vendosur të heqin menjëherë pezullimin e ndihmës ushtarake dhe të ndarjes së informacionit të inteligjencës për Ukrainën. Ky vendim u bë i ditur pas bisedimeve mes delegacioneve të Uashingtonit dhe Kievit, të zhvilluara në Xheda, Arabinë Saudite.
Në deklaratën e përbashkët të publikuar pas takimit, konfirmohet se ndihmat e SHBA-së do të rifillojnë pa vonesë, duke forcuar mbështetjen për Ukrainën në luftën e saj kundër agresionit rus.
Gjatë këtyre negociatave, palët ranë dakord edhe për përshpejtimin e marrëveshjes mbi shfrytëzimin e burimeve minerare të Ukrainës nga Shtetet e Bashkuara. Kjo marrëveshje do të finalizohet “sa më shpejt të jetë e mundur”, sipas njoftimit zyrtar.
Ndërkohë, Shtëpia e Bardhë ka përshkruar bisedimet e mbajtura në Xheda si “pozitive” dhe “produktive”. Zëdhënësja e saj, Karoline Leavitt, deklaroi se samiti, i cili zgjati më shumë se shtatë orë, ka sjellë rezultate konkrete dhe se një raport i plotë mbi takimin do të publikohet së shpejti.
Ky zhvillim sinjalizon një angazhim të vazhdueshëm të SHBA-së për të mbështetur Ukrainën, si në aspektin ushtarak, ashtu edhe në atë ekonomik, në një moment kyç të konfliktit me Rusinë.
