Për herë të parë që nga 2013, sasia e birrës së importuar në vend ishte më e madhe se ajo e prodhuar. Birrat vendase kanë vijuar që të tkurren në tregun vendas, duke lëshuar terrenin për operatorët e huaj, teksa konsumi po vjen në rritje. Operatorët kryesorë të tregut ankohen se janë në pozita jo favorizuese me importin dhe se po humbin konkurrueshmërinë në krahasim me rajonin, shkruan revista “Monitor”. Të dhënat nga Doganat tregojnë se prodhimi vendas shënoi rënie me 181 mijë litra (më pak se 1%), ndërsa në total tregu, ku përfshihen importet dhe prodhimi vendas, u rrit me 2%.
Hyrja e këtyre importuesve dhe kapja e tregut për një periudhë të caktuar kur shteti ishte i pavëmendshëm për akcizën që duhet të paguanin ata si birra të huaja, apo për birra me prodhim mbi 200 mijë hektolitra, bëri që ata të forcojnë pozicionet e tyre në treg dhe të jenë më konkurrues se prodhimi vendas.
Shkaku i dytë se për se industria vendase po përjeton këtë dramë, sipas aktorëve të tregut, janë kostot shumë të larta të operimit. Luan Bregasi thotë për “Monitor” se industria vendase ka kosto më të larta ku përfshihen: çmimi i lartë i energjisë elektrike, çmimi i lartë i naftës, kostot e larta të kredive bankare, kosto e lartë e ujit, akcizat e larta, etj. Në kërkesat që i kanë parashtruar qeverisë prodhuesit vendas ka qenë edhe ulja e çmimit të energjisë elektrike
Nënçmimi i euros ka qenë një faktor favorizues për birrat e importit. Monedha e përbashkët preku nivelin më të ulët të këmbimit në dhjetë vitet e fundit në verën e vitit 2018 dhe vijon ende të këmbehet në nivele të ulëta përkundrejt lekut. Sipas prodhuesve vendas, kjo i favorizoi birrat e importit që të dalin me çmime promocionale gjatë verës dhe për festat e fundvitit./Opinion.al
