Ditën e sotme gazeta gjermane “Bild” ka publikuar 16 audio-përgjime të reja, në të cilat përfshiheshin përfaqësues të Partisë Socialiste si dhe vet kryeministri Edi Rama.
Por teksa, ka publikuar audio-përgjimet gazeta gjermane e ka shoqëruar me komentin, “Shqipëria po rrëshqet drejt kaosit total dhe tani po konsiderohet si republikë e drogës, thënë ndryshe Kolumbia e Europës”.
Po ashtu, “Bild” ka kritikuar ashpër Prokurorinë shqiptare, ndërsa thekson se Shqipëria një republikë mafioze dhe se klanet kriminale sundojnë jetën politike dhe publike.
Ndërsa, shton më tej media gjermane, korrupsioni në vendin tonë është diçka normale, po ashtu dhe shit-blerja e votës.
Ndër të tjera “Bild” shkruan se Shqipëria rrezikon të kthehet në një kërcënim për Ballkanin e paqëndrueshëm.
“Shqipëria është shndërruar në një republikë mafioze, ku klanet kriminale sundojnë jetën politike dhe publike. Korrupsioni është një gjë normale, gjithashtu dhe blerja e votës”, thekson media gjermane duke shtuar se në bazë të përgjimeve kryeministri Rama ishte në dijeni dhe pjesë e manipulimit zgjedhor./ Opinion.al E.Xh.
