Gazeta gjermane “Bild” ka publikuar sot për herë të parë regjistrime audio të “Dosjes 339”, pjesë e së cilës është grupi i Avdylajve të Shijakut. Në përgjimet audio të publikuara online dëgjohet Astrit Avdylaj që flet për çështje votash në favor të kandidatit të Partisë Socialiste në qarkun e Durrësit, Ilir Ndrazhi.
Në një tjetër regjistrim ai dëgjohet të flasë me drejtorin e Ujësjellës-Kanalizime të Durrësit, Ivo Doçi, që sipas Bild i kërkon të veçojë punonjësit që mbështesin Partinë Demokratike. Në këto përgjime, sipas Bild, Avdylaj flet edhe me Kryetarin e Bashkisë së Shijakut, Ardian Kokomani me ish-drejtorin e IKMT-së së Shijakut, Elton Arbana apo dhe Arjan Ndrazhin, vëllain e deputetit socialist Ilir Ndrazhi.
DOSJA E PLOTË/ Bild publikon bisedat e reja mes Avdylit dhe Dakos
Mes bisedave të regjistruara të Bild është edhe një bisedë mes Astrit Avdylit dhe kryetarit të Bashkisë së Durrësit, Vangjush Dako me të cilin vendosin të lënë një takim sëbashku. Për këtë ka reaguar dhe kryetari i PD-së Lulzim Basha. Në një status në rrjetet sociale ai thotë se këto përgjime janë tregues i historisë politike të Edi Ramës.
“Ai ka ardhur në pushtet nga krimi dhe e mban pushtetin me krimin e për krimin”, thekson Basha.
Sipas tij vendi ka nevojë për zgjidhje politike, e cila kalon përmes largimit të kryeministrit ilegjitim Edi Rama, krijimin e një qeverie tranzitore, që të garantojë zgjedhje të lira e të ndershme.
REAGIMI I PLOTË
Përgjimet e publikuara nga gazeta prestigjioze BILD kanë tronditur sot shumë shqiptarë dhe shumë miq të huaj, të cilët kanë hequr çdo dyshim se për të mbajtur pushtetin e kalbëzuar nga korrupsioni, Edi Rama ka bërë pakt me krimin, ka blerë vota nëpërmjet bandave dhe trafikantëve ndërkombëtarë të drogës.
6 përgjimet e publikuara nga media gjermane si pjesë e dosjes 339/1 janë radiografia e pushtetit mafioz dhe ilegjitim të Edi Ramës.
Bisedat tregojnë fuqinë e krimit të organizuar:
• Për të ndikuar në emërimin e deputetëve dhe të kryebashkiakëve të PS.
• Për të blerë votat për llogari të Edi Ramës sipas objektivit të caktuar prej tij.
• Për të urdhëruar administratën publike të identifikojë kundërshtarët politikë të Edi Ramës, që t’i kërëcënojë për votën e tyre.
• Për të marrë favore shtetërore në kundërshtim me ligjin.
• Për t’u informuar për axhendën politike brenda dhe jashtë vendit të kryeministrit.
Përgjimet që mbahen peng nga prokuroria e kontrolluar prej Edi Ramës, janë konfirmim i pakundërshtueshëm se:
• Parlamenti i dalë nga zgjedhjet e vitit 2017 është produkt i krimit të organizuar.
• Qeveria e Edi Ramës është ilegjitime.
• Me Edi Ramën nuk mund të ketë zgjedhje të lira e të ndershme.
Përgjimet e publikuara nga BILD janë tregues i historisë politike të Edi Ramës: ai ka ardhur në pushtet nga krimi dhe e mban pushtetin me krimin e për krimin. Sot më shumë se kurrë, vendi ka nevojë për zgjidhje politike, e cila kalon përmes largimit të kryeministrit ilegjitim Edi Rama, krijimin e një qeverie tranzitore, që të garantojë zgjedhje të lira e të ndershme./ Opinion.al
