Ndonëse ende pritet konfirmimi përfundimtar zyrtar për godinat e dëmtuara nga tërmeti, kryeministri Rama dha sot disa shifra paraprake për rrethin e Durrësit dhe Tiranës.
Në Durrës Rama tha se 19 ndërtesa të dëmtuara janë të pabanueshme 12 prej të cilave do të prishen.
“Në Durrës kemi 19 ndërtesa të mëdha të dëmtuara, të pabanueshme, 12 prej tyre do prishen. Dje është shembur i pari për 7 të tjerët do presim një raport të huaj që të kemi garanci të plota. Duhet të angazhojmë të gjithë inxhinierët, por duhet të kemi kujdes nga abuzimi. Kjo do të monitorohet nga një kontroll i dyfishtë”, tha Rama.
Ai shtoi se në Tiranë 1192 banesa kanë pësuar dëmtime ndër to 8 shkolla.
“Në bllokun e pallateve në Urën e Daljanit, rruga Aleksandër Goga, Shkozet, thumanë Bubq dhe Manzë. Në Tiranë 1192 banesa që kanë dëmtime serioze dhe tani 265 pallate kërkojnë vlerësim. 8 shkolla të dëmtuara, një qendër shëndetësorë”, tha Rama.
Sa i përket strehimi të personave të prekur nga tërmeti, kreu i qeverisë bëri të ditur se 2472 persona janë aktualisht në hotele nga Durrësi në Gjirokastër.
“Personat në hotele 2472, harku i kësaj mikpritje shtrihet nga Durrësi në Gjirokastër. Një pjesë e tyre nuk kanë humbur plotësisht shtëpinë, por janë në kushte frike që nuk lidhen me patjetër me qëndrueshmërinë e godinës por ne nuk do të lëmë pa i shërbyer në këtë fazë të parë.”, tha ai.
Për këto persona nuk do të mungojnë ilaçet, mësuesit dhe psikologët tha ndër të tjera Rama.
“Njerëzit në hotele do trajtohen si turistë, ata kanë nevojë edhe për një psikolog. Nuk mund t’i kthehet fjala edhe sikur të bëjnë diçka që një turist nuk do ta bënte. Kjo është bërë përmes një kontrate dy palëshe detyruese. Ilaçet do të jepen falas 100%. Në çdo strukturë do ketë mjek të dedikuar dhe infermier si pjesë e strukturës së urgjencës kombëtare. Kur të mbarojnë 8-orarëshin në shtet do shkojnë atje. Nxënësit që janë në këto hotele do vazhdojnë mësimin. Do garantohet transporti. Të ketë mësues që t’i ndjekë pasdite. Fëmijëve t’i çohen lodra dhe një person që të merren me ta, sepse nënat kanë nevojë për pak pushim”, tha Rama. /Opinion.al
