TIRANË- Nga të dhënat e deritanishme të policisë, rezulton se gjyqtari Artan Gjermeni nuk është plagosur aksidentalisht në garazhin e tij, siç vetë gjyqtari kishte deklaruar. Burime nga komisariati nr.1 në Tiranë që po kryen hetimet, thonë se në garazh nuk janë konstatuar njolla gjaku apo ndonjë objekt që të provojë dëshminë e gjyqtarit.
Ndërsa disa banorë të pallatit dhe një polic privat kanë deklaruar në polici se në garazh nuk ka llamarina dhe se nuk i kishin parë asnjërën nga makinat e Gjermenit të kalonin aty përgjatë dy orëve të fundit (para ngjarjes).
Një natë më parë, gjyqtari Artan Gjermeni u paraqit i plagosur në dorë dhe krah. Ai deklaroi se i ka rënë qepeni i garazhit aksidentalisht, ndërsa burime nga spitali thanë se Gjermeni kishte plagë nga një mjet prerës. Dyshohet se gjyqtari mund të jetë plagosur me thikë.
