Ka nisur betonizimi i pamjes së ujëvarave të lumit Vjosë, si pasojë e ndërtimit të një hidrocentrali në Grykën e Këlcyrës, duke dhënë një dorë në shkatërrimin e biodiversitetit.
Mësohet se një kompani ndërtimi ka nisur punën dhe prej disa ditësh janë vënë re gërmime në breg të Vjosës, në krah të ujëvarave si dhe betonizim të shkëmbinjve.
Burimet tregojnë se Bashkia e Këlcyrës nuk ka bërë asnjë koment për firmën në fjalë, ndërsa policia ka shkuar në vendngjarje por është larguar pa marrë asnjë masë.
Specialistët e konsiderojnë betonizimin e Grykës së Këlcyrës një akt tjetër të rëndë ndaj mjedisit, i cili i shtohet rrezikut të dëmtimit të lumit Vjosë nga ndërtimi i hidrocentraleve.
Shumë pak shqiptarë janë të vetëdijshem se Vjosa, lumi më i madh i Shqipërisë jugore është lumi i fundit në Europë, i cili, deri tani, nuk e ka ndërruar rrjedhën e tij.
Ndërtimi i HEC-ve në Vjosë ka hapur prej kohësh një debat të madh ndër ambientalistë, të cilët e kanë konsideruar një dëm të rëndë që i bëhet biodiversitetit.
Vitin e kaluar rreth 50 profesorë dhe studiues nënshkruan një kërkesë drejtuar Ministrisë së Mjedisit në Shqipëri për zbatimin e një moratoriumi 3-vjeçar mbi ndërtimet në lumin Vjosë dhe degët e saj.
Më herët gjatë zgjedhjeve vendore të vitit 2015, kryeministri Edi Rama kishte premtuar edhe njëherë se do të ndalonte ndërtimin e HEC-ve mbi lumin më unik të Europës. Por premtimi me shumë gjasa nuk është mbajtur.
