Forcave të Armatosura do t’u shtohen edhe 116 oficerë të rinj.
38 kadetë dhe 78 studentë, mes të cilëve 10 janë nga Kosova janë betuar në një ceremoni të veçantë.
I pranishëm në këtë ceremoni ishte ministri i Mbrojtjes Pirro Vengu, i cili theksoi rëndësinë e këtij momenti për jetën studentore ushtarake dhe ndikimin që ai do të ketë gjatë gjithë karrierës së këtyre të rinjve në radhët e Forcave të Armatosura:
“Betimi Ushtarak është një vazhdim i traditës së besëlidhjes, i dhënies së fjalës në kuvende popullore ose para luftëtarëve të organizuar për liri e pavarësi në shekuj. Asgjë më shumë nuk do t’ju japë nder, siguri dhe dinjitet, sesa uniforma e ushtarakut, uniformë e cila sot qëndron denjësisht përkrah aleatëve në NATO.
Në 4 vitet e ardhshme ju do të mësoni peshën dhe përgjegjësinë, por edhe fisnikërinë e uniformës. Akademia e Forcave të Armatosura në formimin e gjeneratës së re të oficereve duhet të ketë si pikësynim për të diplomuar individë që janë të certifikuar në angazhimin, përkushtimin ndaj vendit, karakterin e kompetencën”, u shpreh ministri Vengu.
Ministri i Mbrojtjes tha se sot, po kryhen një sërë hapash realë në zhvillimin e Forcave të Armatosura të RSH për sa i përket trajtimit të ushtarakut, transformimit dhe modernizimit të FARSH.
Në mbyllje të fjalës së tij, ministri Vengu shprehu falënderimet për stafin akademik dhe personelin komandues për arritjet dhe përmbushjen e objektivave të programit të trajnimit.
Në këtë ceremoni u betuan 38 kadetë, të cilët do të vijojnë për një vit studimet pasuniversitare për oficerë dhe 78 studentë të rinj, të cilët do të studiojnë për 4 vjet pranë Akademisë së Forcave të Armatosura.
