Në Gjykatën e Krimeve të Rënda është mbajtur sot seanca e radhës gjyqësore ndaj të akuzuarve për terrorizëm.
9 të pandehurit kanë bërë mbrojtjen e tyre para gjykatës.
Gjatë seancës, ish – imami i xhamisë së Unazës së Re, Genci Balla u shpreh se në ligjëratat e tij ka predikuar Kuranin, të botuar nga Komuniteti Mysliman, por sipas tij, Prokuroria nuk e thotë dot këtë.
Balla e bazoi të gjithë mbrotjen e tij tek Kurani, duke lexuar ajete kuranore në sallën e gjyqit. Ish – imami i akuzuar tha se po dënohet vetëm sepse beson në Kuran.
Ndërsa i akuzuari tjetër, Gerti Pashja, pretendoi se Prokuroria, gjatë leximit të pretencës ka sjellë prova të cilat nuk janë shqyrtuar më parë.
Ai kërkoi që t’i vihen në dispozicion këto prova.
9 të pandehurit në këtë proces Genci Balla, Bujar Hysa, Gert Pashja, Fadil Muslimani, Orion Reci, Edmond Balla, Astrit Tola, Verdi Morava dhe Zeqir Imeri, akuzohen për rekrutim të personave për kryerje të veprave terroriste, financim terrorizmi si dhe nxitje, thirrje publike dhe propagandë për kryerjen e veprave me qëllime terroriste.
Vendimi për ta pritet të jepet në seancën e radhës. /tvklan.al
