Kryeministri Edi Rama në konferencën e përbashkët me homologun britanik, Keir Starmer foli për marrëveshjen e emigrantëve.
Ai u pyet nga gazetarët se nëse Britania planifikon në ngrejë në vendin tonë kampe refugjatësh, njësoj siç ka bërë Italia.
Gjatë fjalës së tij, Rama tha se diçka e tillë nuk do të ndodhë.
Duke qeshur, ai tha se i qëndron besnik martesës me Italinë dhe pjesa tjetër është thjesht dashuri.
“Kam qenë shumë i qartë kur nisëm këtë proces me Italinë. Kjo ishte një marrëveshje e vetme me Italinë për shkak të marrëdhënies sonë të veçantë, por edhe për falë situatës gjeografike që është mjaft kuptimplotë.
Dhe për të qenë shumë i sinqertë me ju, na kanë kërkuar një sërë vendesh dhe u kemi thënë jo, sepse i jemi besnik martesës me Italinë dhe pjesa tjetër është thjesht dashuri…”, u shpreh Rama.
Ndërkohë nga ana tjetër, kryeministri britanik ka thënë se vendi i tij po e diskuton një marrëveshje të tillë me shumë shtete të tjera.
“Po po e diskutojmë këtë çështje me një sërë shtetesh përsa u përket këtyre qendrave të kthimit. Dhe këtë e shoh në fakt si një çështje novatore të re dhe të rëndësishme, që është në përputhje me punën që ne kemi bërë për përshembull uljen e numrave nga Shqipëria, numrin rekord të kthimeve që ne kemi pasur… Edhe po i bëjmë këto diskutime ndërkohë”, tha Starmer.
