Një grup besimtarësh mysliman kanë kundërshtuar nenin 18 të pjesës së dytë të Kushtetutës së Republikës së Shqipërisë, për mosdiskriminimin, duke shtuar fjalët “orientim seksual”.
Me anë të një deklarate të shpërndarë për mediat ata bëjnë me dije se i bashkohen zërave të arsyeshëm si ato të Kishës Katolike, disa politikanëve, mendimtarëve dhe aktivistëve në mbrojtje të institucionit të familjes tradicionale si e vetmja formë që garanton vazhdimësinë dhe mirëqënien e shoqërisë njerëzore.
Besimtarët deklarojnë se propozimi për ndryshimin e nenit 18 të pjesës së dytë të Kushtetutës së Republikës së Shqipërisë, për mosdiskriminimin, duke shtuar fjalët “orientim seksual”, ka si qëllim të shpallë si antikushtetues Kodin e Familjes dhe të legalizojë martesat mes të njëjtës gjini, të krijojë një bazë kushtetuese të pakundërshtueshme për këto ndryshime, bazë e cila nuk është parë e nevojshme të përfshihet në asnjë kushtetutë të një vendi të lirë e demokratik, përjashtuar kushtetutën e Republikës së Kosovës.
Mirëpo, në lidhje me ndryshimet kushtetuese, veçanërisht me nenin 18 të saj, kleri mysliman ende nuk ka mbajtur një qendrim zyrtar në lidhje me çështjen në fjalë.
Deklaratën e kanë nënshkruar rreth 129 besimtarë.
