“Lezha ka përkujtuar 581 vjetorin e Besëlidhjes së princave shqiptarë për të luftuar kundër regjimit otoman. Kjo datë historike bëri bashkë autoritete nga të gjitha trevat shqiptare, mes të cilëve edhe një delegacion i Arbëreshëve të Italisë”, raportoi gazetari Martin Marku.
Bashkë me homazhet pranë vendvarrimit të heroit tonë kombëtar Gjergj Kastriot Skënderbeu, në kuadër të kësaj datë historike u përurua edhe shtatorja e tij.
2 Marsi mbetet një testament i unitetit kombëtar.
“Sot pas më shumë se 5 shekujsh historia a mëson se uniteti kombëtar nuk është thjesht një koncept i se kaluarës, por një domosdoshmëri për të tashmen dhe të ardhmen tonë”, tha presidentja e Kosovës, Vjosa Osmani.
“Lezha është përzgjedhja e fatit të jetë simboli i bashkimit, i aleancës dhe ndjenjës së atdhedashurisë”, tha Pjerin Ndreu.
“Sot në një botë që po ndryshon është shumë e rëndësishme të përcjellim betimin e prijësave shqiptarë dhe ne duhet të jemi sëbashku”, tha Genc Nimanbegu, kryetar i Komunës së Ulqinit.
“Ne nuk e kemi komoditetin e heshtjes, derisa Serbia vazhdon të na trajtojë si të padukshëm. Shqipëria dhe Kosova janë zëri ynë, mburoja jone, fuqia jonë”, tha Ardita Sinani, kryetare e Bashkisë së Preshevës.
“Besëlidhja e Lezhës do të mbetet përherë simbol lirie”, kështu shprehen disa nga shqiptarët e Kosovës të pranishëm në Lezhë.
Në sheshin “Gjergj Kastrioti” sot u çel edhe panairi i artizanatit. Edhe këtë vit 2 Marsi, “Besëlidhja e Lezhës” mbetet festë jo zyrtare.
Tv Klan
