Kryetari i Partisë Demokratike, Sali Berisha uroi të gjithë besimtarët myslimanë me rastin e Fitër Bajramit. Ai ishte në Komunitetin Mysliman të Shqipërisë ku u takua me kreun e saj, Bujar Spahiu.
“Erdha për të uruar Fitër Bajramin kryetarit të Komunitetit Mysliman, zotit Spahiu, bashkëpunëtorëve të tij dhe me këtë rast të gjithë besimtarëve myslimanë që kanë agjëruar, por edhe të gjithë besimtarëve të Zotit, këtë ditë të nderimit, të përkushtimit, sakrificës dhe përkushtimit të njeriut ndaj të madhit Zot, vlerave hyjnore më të mira”, tha Berisha.
Kryedemokrati u shpreh para gazetarëve se me këtë rast u zotua para kreut të KMSH-së se nga vendimet e para që do të marrë nëse fiton zgjedhjet do të jetë dyfishimi për komunitetet fetare. Ndër të tjera premtoi se do të përcaktohet në ligj e drejta e besimtarëve për t’u falur ditën e premte për të mos e bërë në këtë mënyrë orarin zyrtar pengesë. Po ashtu theksoi se do të bëhet një përpjekje madhore për rikthimin ose kompensimin e pronave të komuniteteve fetare.
“E shfrytëzova rastin për të zotuar para kryetarit të Komunitetit Mysliman zotit Spahiu dhe të gjithë shqiptarëve se pas 11 Majit nga vendimet e para dot ë jetë dyfishimi i fondit për komunitetet fetare, fond që është i domosdoshëm dhe u takon plotësisht sikundër një përpjekje madhore do të bëhet për rikthimin e pronave të tyre, ose kompensimin, pasi pronat e komuniteteve fetare janë pronat më të plaçkitura në Shqipëri. Së treti garantoj dhe garantova kryetarin e komunitetit se falja ditën e premte do të përcaktohet në ligj dhe në orar dhe çdo besimtar mysliman që dëshiron të kryejë detyrën e tij me faljen në xhami do ketë kohën e dhënë për këtë destinacion. Pra nuk do mund të bëhet më orari zyrtar pengesë që njerëzit të falin të premten që është dita për myslimanët dhe kjo nuk është lehtësi, është detyrim, do vendoset menjëherë pas 11 Majit”, tha Berisha.
