Edhe pse në arrest shtëpie, ish-kryeministri Sali Berisha e ka gjetur mënyrën për të folur para demokratëve.
Ditën e sotme ai ka dalë në dritaren e banesës së tij duke folur me mbështetësit e tij të cilët janë mbledhur me pankarta në duar poshtë pallatit.
Gjatë fjalës së tij ai theksoi se kjo betejë është për pluralizmin dhe se ai nuk do heqë dorë derisa ata që i quan “laro të kryeministrit” të marrin vendin që meritojnë.
Në këtë betejë ju garantoj se ne jemi shumica e shqiptarëve sepse ata janë kundër mafies, megjithatë për momentin është sundimi i shtetit të mafies. Të gjithë ne kemi votën e lirë, por nëse Rama dhe ministrat e tij janë vrasës të saj në terren, Dumani, Kraja dhe horra të tjerë janë vrasës të saj në dosjet që nuk i hapin kurrë! Këta janë laro, armiq të lirive tuaja. Janë gati të shkelmojnë mbi lirinë tuaj më themelore, votën. Pak muaj më parë në zyrat e ekstremistit Altin Dumani mbërrin dosja zyrtare në të cilën dëshmohet se fallangat e partisë së krimit meqënëse nuk fitonin dot Hasin, kërkonin të eliminonin kandidatin e PD. Dumani është një vrasës si ata sepse fsheh krimin e tyre, por ju jap fjalën se atë fytyrë siç e ka do ia nxjerr para shqiptarëve”, u shpreh Berisha.
