Kryetari i Partisë Demokratike, Sali Berisha me urdhër të Prokurorisë së Posaçme Anti-Korrupsion, duhet të paraqitet ditën e sotme, 10 qershor, në orën 10:00, në ambientet e SPAK.
“Të paraqitet në Prokurorinë e Posaçme Kundër Korrupsionit dhe Krimit të Organizuar, pranë Hetuesit të Byrosë Kombëtare të Hetimit z.Ardit Neli, me dokumment identifikimi me vete”, thotë Prokuroria.
Bëhet e ditur se kryedemokrati do të pyetet në cilësinë e personit që ka dijeni lidhur me një hetim. Në rast se Berisha nuk paraqitet në ditën dhe orën e caktuar, ai do të paralajmërohet për shoqërim të detyrueshëm.
Ndërkohë, avokati i Berishës, Genc Gjokutaj bën me dije se bëhet fjalë për një kallëzim që gjyqtarja Irena Gjoka ka depozituar në emër të kreut të PD-së.
“Nesër në orën 10.00 SPAK ka thirrur Dr. Berishën për të dhënë shpjegime në lidhje me nje kallëzim qe Gjyqtarja Irena + mbiemra 3 copë ka depozituar! Historikisht keshtu ndodh rëndom me Drejtësine shqiptare: Hajduti bërtet kapeni hajdutin! G”, shkruajti Gjokutaj, krahas shkresës më poshtë:
Kujtojmë se Berisha e ka akuzuar vazhdimisht gjyqtaren në fjalë, ndërsa së fundmi ka pretenduar se ajo rezulton e dënuar për falsifikim nga Kolegji Penal i Janinës. Ndaj saj, ka bërë edhe kallëzim në tetor 2023, pas vendimit të GJKKO për detyrim paraqitje dhe ndalim i daljes jashtë vendi të kryetarit të Partisë Demokratike.
Nga ana tjetër, Prokuroria e Përgjithshme i ka kërkuar KLGJ-së që t’i vërë në dispozicion dosjen e gjyqtares Irena Gjoka. Kërkesa është bërë në datën 19 prill, kur u publikuan për herë të parë, fakte nga media greke për një urdhër dëbimi të dhënë për gjyqtaren Gjoka, nga policia e vendit fqinj. Pasditen e së martës është njoftuar nga KLGJ se kjo e fundit i ka dorëzuar Prokurorisë së Përgjithshme të gjithë dosjen e gjyqtares, përfshirë edhe formularin e vetë-deklarimit, i cili konsiderohet si më kryesori në këtë rast./tvklan.al
