Deputeti demokrat Sali Berisha i ka qëndruar mbrapa deklaratave të tij për armatosjen e popullit. Ai tha se Policia është me krimin dhe se qytetarët duhet të armatosen që të mbrohen prej krimit sepse sipas tij destabilizimi i vendit po vjen.
“Destabilizimi po vjen, këtu do të jemi. Tani ka vrasje më shumë se kurrë ndonjëherë. Asnjëherë nuk kemi qenë në këtë gjendje”, tha Berisha duke i’u përgjigjur Eni Vasilit.
Berisha ripërsëriti se Emiljano Shullazin e arrestoi prokuroria dhe jo policia.
“Po të ishte për policinë, Emiljano Shullazi do të ishte arrestuar më herët. Atë e thirrën atë natë, për ti ndërtuar alibinë, për kërcënimin ndaj akademikëve, por prokuroria veproi me vendosmëri duke e arrestuar. Po të ishte për policinë, sot do të ishte në burg nipi i Emiljano Shullazit, i cili u shoqërua një muaj më parë, por që Emiljano Shullazi shkoi dhe ua rrëmbeu, e nxori prej andej dhe rrahu policin që e shoqëroi”.
Në vijim të denoncimit të policisë, Berisha u shpreh më tej se “në prokurori ka kriminelë që shesin dosjet sekret, dosje që rëndom publikohen edhe në media”, u shpreh më tej Berisha.
Duke komentuar përjashtimin e tij për 10 ditë, ai u shpreh shkurt, “më kanë nderuar”.
Në studion e Eni Vasilit, Berisha tha se kishte mësuar nga një prej hetuesve të dosjes së tritolit në farmacinë e babait të ministrit të Brendshëm se të gjitha dyshimet ishin për Emiljano Shullazin.
Ai tha se ky hetues i ka referuar të dhënat në grupin hetimor, por e kanë larguar menjëherë nga hetimet.
Berisha tha se Gjutët e arrestuar ishin të pafajshëm pasi ndaj tyre nuk kishte asnjë provë.
Ish-kryeministri ka zbuluar se për çështjen Shullazi ka folur edhe me ambasadorin amerikan Donald Lu dhe atë të BE-së Romana Vlahutin në takimet që ka pasur me ta.
Berisha tha se i ka informuar për lidhjet e tij me ministrat dhe qeverinë.
Por shpërthimin më të madh Sali Berisha e pati kur foli për Jaho Salihin (Mulosmani), një ndër të dënuarit e dosjes “Tropoja”, për vrasjen e Azem Hajdarit.
Berisha aludoi se Edi Rama ka dërguar njerëz që ta intervistojnë atë në burg, që të thoshte se adhuron Edi Ramën.
“Por ju tregoj unë ju se çfarë krimineli është Jaho Salihi”, tha Berisha.
“Ai pasi ekzekutoi bashkëshorten, e përdhunoi 24 orë rresht”, – ka qenë akuza tronditëse e Berishës.
