Kreu i PD-së Sali Berisha ka bërë publik ditën e sotme programin e forcës së tij politike, me anë të cilit ka premtuar ulje të çmimit të energjisë, çmimit të naftës dhe rritje të pagës minimale.
Gjatë mbledhjes së Kryesisë, Berisha tha se çmimi i energjisë për bizneset do të ulet me tre herë, ndërsa nafta me 40%.
Sipas tij ky program, synon ndarjen me shpejtësi të Shqipërisë nga varfëria e skajshme, duke u angazhuar në një shpërndarje të re të ardhurave buxhetore.
”Sot në këtë mbledhje miratojmë kandidaturat e qindra demokratëve, të cilët kanë shprehur gatishmërinë e tyre për të marrë pjese në procesi e primareve, proces ky nga themelorët për të qenë kandidat për deputetë në Kuvendin e Shqipërisë, nga PD.
Kam një falënderim shumë të veçantë për secilin, të gjithë ata që morën pjesë, besim që ata shprehën te PD, vendosmërinë e tyre, për të vazhduar sipas rastit ëndrrën e tyre më të bukur politike, në gjirin e kësaj partie.
Ka patur një numër të madh kandidaturash dhe kjo është dëshmi e shkallës së lartë të besimit që kanë shqiptarët te PD. Por, para se të kalojnë në trajtimin e listave të përcjella nga degat e PD në Shqipëri, dua të ndalem të disa momente më kryesore, zhvillimet më të rëndësishme.
Mendoj se zhvillimet më të rëndësishme dhe interesin e shqiptarëve ka qenë paraqitja e programit të PD-së për çështjet më thelbësore të qytetarëve shqiptarë, program i cili jo vetëm që u jep përgjigje problemeve të rënda të akumuluara këto 12 vite, por u jep përgjigjen më të shkëlqyer. U jep përgjigje dhe zgjidhje më të mirë në interesin e çdo qytetari.
Ky program, synon ndarjen me shpejtësi të Shqipërisë nga varfëria e skajshme, me shpejtësi të rrufeshme, duke u angazhuar në një shpërndarje të re të ardhurave buxhetore.
Ky program, me vendosjen e minimumit jetik, për çdo qytetar shqiptar, vendosjen e rrogës mininale 500 euro, vendosjen e kartës së konsumatorit, që përbëjnë 450 euro për çdo pensionist në vit dhe për ata që janë në minimum jetik. Uljen e ndjeshme të çmimit të energjisë, të ujit.
Ky program i jep një hapësirë të re, shumë më të madhe, lirisë ekonomike dhe të biznesit. Pra, programi tejkalon për mirë edhe parashikimet e atyre që përfitojnë prej tij.
Taksa e pronës do zbresi 5 herë, do ulet me 500%. Çmimi i energjisë për bizneset do ulet tre herë. Çmimi i naftës do ulet me 40%. Tatimi mbi të ardhurat zbret në 10%. Të vetëpunësuarit, që paguajnë taksë edhe si punëdhënës edhe si punëmarrës, do të kenë vetëm një. Do nxitet prodhimi me një seri stimujsh. Shqipëria prodhuese do të jetë motoja jonë. Midis Shqipërisë hotel dhe Shqipërisë prodhuese, ne jemi për Shqipërinë prodhuese”, u shpreh Berisha.
