Kryetari i Partisë Demokratike, Sali Berisha ka zhvilluar pasditen e sotme një takim me strukturat e PD-së në Durrës.
Gjatë fjalës së tij, kryedemokrati u ndal ndër të tjera te investimet e bëra nga qeveria, të cilat ai i quan ‘vjedhje’ nga kryeministri, për shkak të çmimeve të larta që ato kanë kushtuar.
Teksa Rama e quan buf i kënetës, Berisha e ironizoi duke i thënë se është shndërruar në një banor i kopshtit zoologjik.
“Ata janë në një kaos, janë në një panik të tmerrshëm. A mund të imagjinoni një kryeministër që ka qeverisur 12 vjet dhe nuk është i zoti të mbrojë një vepër të tij. Nuk po them se janë zero, se tuneli i Llogarasë është realitet, pllakat e shesheve janë realitet, por problemi është që kudo që ti prekësh del një vjedhje. Po të përmend tunelin e Llogarasë del 50 milionë euro vjedhje, kjo është realitet. Po të përmend pllakat e shesheve të qyteteve kanë kushtuar më shumë se të gjitha rrugët nga Hani i Hotit në Gjirokastër, nga Morini në Durrës, 2.3 miliardë euro sheshet e qyteteve. Një vjedhje e 10-fishte me çmimin. Ndaj dhe ai nuk ka si të flasë për sukseset, por flet për zhaba, hardhucë, pra e ka shndërruar vetën në një banor të parkut zoologjik që cdo mëngjes si zog qyqe del dhe numëron marrëzira, tregon se është në panik dhe tregon se është i humbur”, tha Sali Berisha.
