Kryetari i Partisë Demokratike, Sali Berisha, zhvilloi një takim me shqiptarët në Parma të Italisë. Ai u shpreh se kryeministri Edi Rama u tmerrua kur pa krah kryetarit të opozitës kryestrategun e fushatës elektorale të presidentit Donald Trump, Chris LaCivita.
“Shkallmoi Edi Rama, u tmerrua, e pa me sy humbjen, fatalitetin e tij. Dhe menjëherë, me mediat e tij, deklaroi se Chris LaCivita u ble nga Berisha. Po, po të ishte puna për të blerë, po ai e ngatërroi Chris LaCivita me McGonigalin”, tha Berisha.
Ai u shpreh se Ramën do ta ndjekë deri ditën e fundit të jetës “hija e Mcgonigal”.
“Një gazetar i madh italian shkruante sot, e kam të paqartë marrëveshjen Rama-McGonigal sepse drejtësia e Biden e mbajti të fshehtë, një marrëveshje në të cilën ai mori një ryshfet 225 mijë. Po ajo marrëveshje ishte e tëra në kurriz të opozitës. Ishte marrëveshja për të shkatërruar opozitën në Shqipëri. Por kësaj radhe, postimi i këtij gazetari nuk mbeti në vesh të shurdhër. Kryetari i komitetit kombëtar republikan, Chris LaCivita e bëri share dhe u shpërnda në të gjithë elitën drejtuese të SHBA. Edi Rama, ja ku po të them nga Parma se hija e McGonigalit do të ndjekë gjer në ditën e fundit të jetës. Je i pashpresë”, tha Berisha.
