Nga Paskuqani, ish-kryeministri Sali Berisha ka akuzuar Edi Ramën për korrupsion.
I shoqëruar nga kandidati i koalicionit “Bashkë Fitojmë” për bashkinë e Kamzës, Arjan Hoxha, Berisha tha se Rama “nuk del dot” para qytetarëve pasi “jeton në saraje” që kanë 5 mijë metra park përreth dhe kanë ullinj 3-400 vjeçarë që kushtojnë nga 20 mijë euro.
Ai vijoi me thirrjet për kryeministrin duke e ftuar që të tregojë para qytetarëve “dramën” që ka shkaktuar i vëllai dhe ortakët e tij me call-centerat, duke përfituar sipas tij mbi 2 miliardë euro.
“Sot vendi është një diktaturë sepse të gjitha pushtetet janë të përqendruara në një dorë. Sot në Shqipëri çdo pushtet qendror dhe vendor, i drejtësisë, mediave, parlamenti, janë në duart e një njeriu. Kjo përbën në kuptimin e vërtetë të fjalës pushtetin më abuziv dhe të rrezikshëm për vendin dhe qytetarët. Kjo është një diktaturë e bazuar në një organizatë kriminale që qeveris duke vjedhur nga mëngjesi në darkë, duke grabitur pasuritë e vendit, duke përdorur drogën e krimin. Diktatura e bandës është forma më e rrezikshme dhe e shëmtuar e gjithë diktaturave. Edi Rama nuk del dot kurrë. Si mund të dalë ai që jeton në saraje. Kam qenë rrogëtar i këtij shteti 30 vite, një apartament 130 metra kam, më të madh nuk e blija dot, kjo është e vërteta. Po ti që ndërtove sarajet me 5 mijë metra park përreth, me ullinj 300-400 vjeçarë që kushtojnë 20 mijë euro. Hajde thuaju këtyre qytetarëve dhe tregoji ku i ke marrë. Nuk i ke trashëgimi nga nëna apo baba ato, i ke vjedhur. E kam ftuar dhe e ftoj, hajde dil para qytetarëve. të dy kemi familjarë. Ata nuk mund të fitojnë tendera. Nuk del dot Edi Rama sepse ka përdorur pushtetin për pasurimin e tij. Hajde pak të tregoj se çfarë drame ka krijuar Olsi me ortakët e vetë, mbi 2 miliardë euro me call-centera. Ai ka firmosur dhe unë kam firmosur. Ti ke firmosur 420 milionë euro djegësat. Po shkojnë paratë në Teheran. Ja Kipja që u merr për xhepat e Ramës dhe Velisë 29 euro tarifë për mbetjet. Pasi e kemi kritikuar u mor me rrogat, mashtrues i paskrupullt. Ja rrita rrogën presidentit tha, 4.6 milionë lekë. Kjo është shpirtkazmëri, me atë akt diferencën mes rrogës së presidentit dhe të pastrueses që ishte 8 deri në 10 herë e bëre 15 herë. Në diktatura bëhen këto”,-u shpreh Berisha.
