Kryetari i Partisë Demokratike, Sali Berisha, në një takim me banorët e Libohovës ditën e sotme akuzoi kryeministrin Rama se ka vendosur një sistem persekutimi ndaj shqiptarëve.
Berisha solli në vëmendje shembullin e një mësueseje, me 30 vite karrierë, që sipas tij është hequr nga puna për shkak të motiveve politike. Sipas kryedemokratit, ky shembull është një tregues se si kjo qeveri funksionon si në komunizëm.
“Edi Rama ka vendosur një sistem persekutimi ndaj shqiptarëve. Nuk ekziston kund në Europë një sistem i tillë. Unë vij këtu dhe kam qenë jashtëzakonisht i prekur nga akti i një mësueseje, 30 vjet mësuese shembullore. U shërbeu fëmijëve tuaj, i shërbeu komunitetit tuaj dhe nxirret shtëpiake vetëm për motive politike.
Do u them një gjë: ne që kemi përjetuar diktaturën, për ata që i kishte armiq klase, i çonte në kampe përqendrimi, burgje, por një qëndrim të tillë ndaj një mësueseje 30 vite në detyrë, nuk e mbante kurrë. Nuk imagjinohej.
Ky është një skenar i turpshëm, një akt i turpshëm, që tregon krizën totale morale të këtij regjimi. Ti nuk mund të sillesh në atë mënyrë. Sigurisht, ose përcakton status, ose ndan ato orë siç janë. Por kjo nuk ndodhte në diktaturë. Nëse nuk ishte i klasifikuar armik klase, sistemohej në një mënyrë apo tjetër, por nuk flakej.
Kudo që shkoj, gjej qindra e qindra qytetarë të dënuar, intelektualë, profesionistë, të larguar për motive politike. Ky është një sistem persekutimi.”,tha Berisha/Opinion.al
