Ish-kryeministri, Sali Berisha, në një dalje për mediat nga selia blu, ka publikuar një video që sipas tij tregon atentatin e dështuar ndaj ish kryetarit të komunës së Shëngjinit, demokratit Salvador Kaçit.
Sipas Berishës, video tregon se si kriminelët i zunë rrugën Kaçit dhe të armatosur dolën për të kryer krimin.
“Në 14 maj kam denoncuar atentatin e dështuar të organizuar nga bandat kriminale ndaj ish kryetarit të Bashkisë së Shëngjinit, njërit prej futbollistëve më të shquar të vendit, demokratit Salvador Kaçi Ai po udhëtonte së bashku me të birin dhe banditë të armatosur i dalin përpara për ta ekzekutuar, por një manovrim i shpejtë i shoferit e bëri të pamundur aktin e tyre kriminal. Atë ditë Edi Rama reagoi menjëherë me një cinizëm, me një tallje ndaj këtij akti sikur ky akt ishte një shpikje e Kaçit dhe nuk kish ndodhur kurrë. U desh kohë që të siguronim videon e këtij akti kriminal, video që do ta paraqes sot. Video tregon se si kriminelët i zunë rrugën dhe të armatosur dolën për të kryer krimin”, tha Berisha.
