Ish-Kryeministri Berisha i është përgjigjur në mbrëmje në emisionin “Studio e Hapur” e Eni Vasilit pyetjes së gazetares nëse do pranonte postin e Presidentit nëse Meta do ti propozonte aleancë duke u kthyer vetë në Kryeministër.
Ju do pranonit një koalicion me Ilir Metën nëse ai do tua propozonte?
Absolutisht janë trillime të mirëfillta të papagajve të Edi Ramës. Koalicionet nuk jam unë që i përcaktoj. Ajo është pyetje e udhëheqjes së partisë. Unë nuk jam më udhëheqës i PDsë. Ky është një vendim që merret pasi shqyrtohet në të gjitha aspektet nga udhëheqja aktuale e PDsë. Unë jam për një fitore të plotë totale të PDsë. Por se çfarë do bëjë PD pas zgjedhjeve atë nuk e përcaktoj unë.
Do pranonit të ishit president me Ilir Metën kryeministër?
Unë jam ndarë nga funksionet politike. Unë mendoj se vendi ka një president të shkëlqyer me dinjitet dhe integritet të lartë. Edhe mund ti përsëritet mandati atij. Unë nuk kam ambicie për asnjë post. Pasioni im është përqendruar në parlament. E kam synim që të jem sërish në listën e deputetëve në parlamentin e ardhshëm. Parlamenti është pasioni im.
