Ndërsa ishte përfolur për largimin e opozitës nga Parlamenti, pas zhvillimeve të fundit, ku deputeti i Partisë Socialiste Armando Prenga i akuzuar për plagosje të rëndë iu rikthye sallës së Kuvendit, ish kryeministri Berisha nuk e ka mohuar opsionin e largimit nga Parlamenti.
Në një deklaratë të ditës së sotme Berisha tha se po e mendon seriozisht largimin nga parlamenti. Edhe pse e cilësoi si një vendim personal, duket se ky vendim do të jetë edhe për Partinë Demokratike.
“Në qëndrimet e mia unë do të shqyrtoj qendrimin në këtë parlament. Ju jeni dëshmitar se si Olsi Rama del protagonist në vjedhjen e shtetit. A mund të vazhdohet më kështu. Asnjë ditë… Ka shpërthyer një lukuni e paparë”, tha ai.
Pyetjes së gazetarëve, nëse do të lërë mandatin Berisha u përgjigj: “Të gjitha opsionet janë të hapura. unë qëndroj i hapur për çdo opsion në kushtet e këtij parlamenti me shkallën me të lartë të kriminalitetit. Kjo situatë është e padurueshme. jo nuk dorëzohemi përballë mazhorancës, jam i bindur që opozita do të vazhdojë betejën me të gjitha mjetet. Unë jam duke menduar personalisht, do të rishqyrtoj në themel qëndrimin tim ndaj këtij parlamenti që më shumë se çdo gjë tjetër ka hajdutët e shtetit”.
