Kreu i Partisë Demokratike, Sali Berisha gjatë një konference të organizuar në kuadër të zgjedhjeve vendore e mbështetur nga partia suedeze ditën e sotme tha se PD ndodhet për herë të tretë në opozitë si pasojë e dobësisë së opozitës dhe jo për meritë të qeverisë.
Berisha shtoi se si asnjëherë në këto 30 vite, dora e qeverisë u shtri mbi opozitën dhe te shqiptarët u krijua përshtypja se Edi Rama është i pamundshëm.
“Ne jemi në mandatin e tretë në opozitë, kjo jo për merita të qeverisë, por për dobësinë e opozitës. Ne kemi pasur dhe kemi një qeveri të bazuar në skandale ‘scandal base government’. Ky udhëtim i opozitës në këto vite ka qenë një udhëtim topitës.
Si asnjëherë në këto 30 vite, dora e qeverisë u shtri mbi opozitën dhe te shqiptarët u krijua përshtypja se Edi Rama është i pamundshëm, nuk mund të mundet dhe opozita si të thuash i bën fresk atij. Në këtë kontekst PD ndodhej para alternativës ‘to be or not to be’, të ekzistonte apo të shkrihej. Por unë mendoj se ajo duhet të ekzistonte sepse mbi 620 mijë shqiptarë e votuan në zgjedhjet e fundit. Por ajo që të ekzistonte duhet të ndryshonte në mënyrë rrënjësore. Duhet të paraqitet para shqiptarëve një parti tërësisht e ndryshuar, përndryshe ata nuk kanë asnjë arsye të na besojnë ne. Në një vit me përpjekje të jashtëzakonshme ne ia kemi dalë, kemi shënuar arritje substanciale për t’u paraqitur parti e ndryshuar para shqiptarëve”, tha Berisha./Opinion.al
