Ish-kryeministri, Sali Berisha, ka vijuar edhe këtë të premte me denoncimet lidhur me zgjedhjet e 14 Majit.
Në konferencën e përjavshme për mediat, Berisha ka publikuar pamje nga qendra të votimit në Kamëz.
Ai është shprehur se në 6 qendra votimi në Kamëz janë gjetur 240 ndërhyrje manipulative.
“Kemi rezultatet e para të shqyrtimit të procesit elektoral në 6 qendra votimi në Kamëz kundrejt 133 qendrave që ka kjo bashki. Në këto 6 qendra janë gjetur 240 raste ndërhyrjeje manipulative. Operatori voton vetë më disa karta identiteti. Komisionerja e PS voton për votuesin. Ka dhe raste të tjera ku voton 1 person për 3 votues”, tha Berisha.
Berisha teksa publikon videon thotë se ka ndërhyrje në procesin e votimit.
“Ja një person që voton me dy xhandarë, një në anë dhe një në anën tjetër. Kjo është farsë kriminale dhe këto janë kriminelë gjakftohtë”, shprehet Berisha.
Sipas Berishës e njëjta situatë ka ndodhur edhe në Elbasan, ku është votuar elektronikisht.
“Të dhënat flasin se në Elbasan janë përdorur gjerësisht këto praktika kriminale dhe asgjë nuk qëndron ne rezultatin e këtyre zgjedhjeve, por ne vazhdojmë shqyrtimin e të gjitha materialeve. Kemi të bëjmë me një dhunim masiv të ligjit”, vijoi Sali Berisha.
