Ashtu siç bëri të ditur pak më parë, Sali Berisha ka zbritur sërish në bazë, kësaj here në kuadër të fushatës elektorale për zgjedhjet vendore. Stacioni i parë i këtij turi ishte Mallakastra ku ai prezantoi Resmi Shanon e dalë nga procesi i primareve si kandidat për kryebashkiak.
“Vijmë këtu për të çelur gjithashtu fushatën elektorale të fitores së PD-së. Resmiu është kandidati që ka mbështetjen e plotë dhe totale të PD-së dhe Sali Berishës. Por Resmiu është kandidati juaj, i zgjedhur nga ju me votën tuaj të lirë. Nuk vjen nga zyrat e askërkujtë, vjen nga ju, nga dëshira juaj.”
Ndonëse Partia Socialiste nuk i ka caktuar ende emrat e kandidatëve të saj, Berisha në fjalën e tij nuk i kurseu sulmet se ai që do të përfaqësojë mazhorancën në këtë bashki do jetë kandidat i bandave.
“Kandidati i Edi Ramës është kandidati i Rama-Gonigal i mafiozëve, i bandave, i krimeve dhe vjedhjeve. Atë se lidh asgjë me ju.”
Kryedemokrati u ndal edhe te zhvillimet brenda kampit demokrat, duke theksuar se Partia Demokratike nën drejtimin e Lulzim Bashës ishte kthyer në një pseudo opozitë.
“Duke parë veprimet e Lulzim Bravës dhe AliBashës, i kam thënë qindra herë vetes time; ku do shkonim ne dhe Shqipëria me këta njerëz. Por labirintet e shpirtit njerëzor askush nuk mund t’i njoh. Edi Rama i ka kapur si skllevër ata. Ata mendojnë se ju nuk i shihni, se qytetarët shqiptarë nuk i shohin. Në historinë 32 vjeçare politike nuk ka patur kurrë, pengje, pengje siç janë Brava dhe Alibasha. Nuk kanë asgjë në moralin e tyre.“
Gjatë fjalës së tij, kreu demokrat nuk i ndali akuzat për qeverinë, duke thënë se gjatë 2022-shit janë qindra miliarda lekë të shpërdoruruara vetëm për godinën Kryeministrore.
