Ish-kryeministri, Sali Berisha, u ndal këtë të shtunë në vendlindjen e tij Tropojë, ku zhvilloi një takim elektoral në kuadër të zgjedhjeve lokale të 14 Majit.
Gjatë fjalës së tij, Berisha iu bëri thirrje tropojanëve dhe të gjithë veriorëve të mos votojnë për Edi Ramën.
Ish-kryeministri, tha se nuk i jepet vota Ramës që ka sivëlla Vuçiçin dhe kundërshtar Albin Kurtin.
“Këto zgjedhje janë shumë më tepër, janë shumë më tepër se zgjedhje për qeveri vendore. Janë zgjedhje kundër një njeriu që ka pushtuar, ka marrë në dorë të gjitha pushtetet dhe i përdor kundër qytetarëve. Kundër një njeriu që ka zbrazur Tropojën si asnjë pushtim. Ka larguar çdo institucion. Kundër një njeriu, që javën e parë që erdhi në pushtet, preu ndihmën ekonomike për qarkun e Kukësit në 20 mijë familje. Një racist i egër! Preu ndihmën ekonomike vetëm pse nuk e votuan në vitin 2013. Tropoja dhe veriu, ia them përsëri, kanë te Edi Rama pas Enver Hoxhës dhe Car Dushanit, armikun më të egër, racistin më të papërmbajtur. Asnjë verior nuk mund t’i japë votën atij. Edi Ramës nuk i jepet vota. U them socialistëve të Tropojës se kam respekt për ta, për qëndrimin në opozitë siç kam qëndruar edhe vetë. Por nuk i jepet vota atij që i thotë se e kam sivëlla Vuçiçin dhe kundërshtar Albin Kurtin”, tha Berisha.
