Në një takim të zhvilluar këtë të mërkurë ish-kryeministri Sali Berisha ka paralajmëruar protesta për ato që i konsideron “aferat më të zeza” të qeverisë, Portin e Durrësit dhe inceneratorët.
Lidhur me aferën e inceneratorëve, Berisha tha se inceneratorët janë pazar. Sipas tij, është gjetur një mafioz dhe i është thënë “ ne do të japim kaq, ti me çelsa në dorë do të na i dorëzosh me kaq”.
Më tej ish-Kryeministri Berisha u shpreh se në Shqipëri janë të varrosura para, duke theksuar se në vendin tonë ka kontenierë me para të mafies.
“Ne do konsiderojmë protesta shumë të fuqishme edhe për inceneratorët edhe për portin. Ne jemi në një revolucion dhe ky revolucion do përballet me regjimin për aferat e tij më të zeza. Nuk ka aferë më të zezë se kjo.
Inceneratorët duken nënfish. Gjetën një mafioz që i thoshin ne do të japim kaq, do marrim kaq, ti me çelësa në dorë do na dorëzosh me kaq dhe ishte pazar ai. Gjysmën e parave e merrte qeveria, gjysmën ai që sillte hekurishtet, që tani nuk funksionojnë në Fier. Tani kanë kaluar në një stad krejt tjetër. Tani jemi offshore, nuk merret vesh kush është, paratë i kemi. Paratë janë të varrosura në Shqipëri. Në Shqipëri ka konteinerë me para të mafies. Ajo qa u kap në Toyota Yaris, ajo është vetëm, të themi kafeja e tyre. Po vërshojnë lumenj Eurosh droge në Shqipëri dhe kompanitë e tyre do fshihen offshore”, tha ndër të tjera ish-Kryeministri Sali Berisha.
