Kryetari i Partisë Demokratike, Sali Berisha ka deklaruar se kryeministri Edi Rama ka marrë epitetin e merituar si “Ramaduro” i Europës.
Nga foltorja e Parlamentit Berisha ka folur edhe tek zgjedhjet e 11 majit, për të cilat tha se autopsia që po i bëhet procesit të farsës elektorale tregon kriminalizmim nga kreu i piramidës tek punonjësi patronazhit të partisë.
“Kreu i partisë së krimit mori epitetin më në fund më të merituar si Ramaduro i Europës dhe gazetari i mirënjohur Njuman shtjelloi pyetjen e tij: Zoti Berisha, na fol pak për situatën në Shqipëri dhe Ramaduron. Pra, është bërë famoz për dy aspekte kryesore, për narkoshtetin dhe farsën elektorale. Ju nuk festuat dot fitoren kallp me farsë sepse këtë verë në Bruksel, në Strasburg dhe në të gjitha forumet ndërkombëtare u damkosët si një grup i shkrirë në një me kartelet e drogës.
Nëse në Shqipëri u zhvillua farsa më e madhe elektorale ajo pati pasqyrimin më damkosës. Pra narkoshteti i parë dhe i vetëm po kundërmon sot cdo ditë e më shumë në Europë, rajon dhe në botë. Autopsia që po i bëhet procesit të farsës elektorale tregon kriminalizmim nga kreu i piramidës tek punonjësi patronazhist i piramidës tuaj. Tregon se zbatuat një piramidë mashtrimi, falsifikimi dhe kjo ishte farsa elektorale.
Përdorët metodat më të turpshme dhe zhvilluat zgjedhje si Zimbabve 30 vite më parë dhe pastaj të mos quhet Ramaduro. U pa gjithashtu se Shqipëria është shteti i vendit monist. Kërkon ndarjen e partisë nga shteti ç’ka nënkupton sundimin e partisë shtet në këtë vend”, tha Berisha.
