Ish-kryeministri Sali Berisha ka folur pas largimit nga Komisioni Hetimor për çështjen CEZ ku ishte thirrur si dëshmitar.
Berisha tha se personi që drejton mbledhjen e Komisionit Hetimor, rezultoi se është në konflikt interesi.
“Ajo që më bëri mua të largohesha nga mbledhja është se ai, në mënyrë të pafytyrë mashtroi opinionin publik shqiptar duke thënë se ishte i padënuar”, tregoi ai.
Sipas tij, Balla është i dënuar me vendim gjykate të formës së prerë.
Përplasja në Komision me Ballën, ka nisur, pikërisht në momentin kur ish-kryeministri Berisha do të betohej.
Berisha i tha Ballës se ai është një shpifës i dënuar me vendim gjykate. Kjo gjë nuk u pranua nga Balla dhe aty nisi gjithçka dhe Berisha më pas u largua.
Ish-kryeministri nxori për alibi konfliktin e interesit që ka me Ballën, pasi është dënuar për shpifje ndaj tij.
“Unë nuk e dija këtë nen të procedurës penale, por e zbuloi juristi Ristani. Prandaj erdha se po ta dija që kishte konflikt interesi edhe mund të mos vija. Për mua nuk ka problem, mjaftonte që ai ta pranonte se është i dënuar, por ai mashtroi opinionin publik. Është dënuar dhe nuk paguan as gjobën”, tha Berisha.
