PD vijon ende të ketë përplasje të forta brenda saj, të cilat duket se do të ndikojnë negativisht edhe në zgjedhjet lokale të 14 majit.
Pas dështimit të negociatave, deputeti Gazment Bardhi ka ironizuar PD e drejtuar nga Sali Berisha për padinë e bërë në Gjykatën Kushtetuese për Portin e Durrësit.
Nëpërmjet një postimi në rrjetet sociale, Bardhi ironizon këtë padi, ndërsa shkruan “Keqardhje për çdo deputet që nënshkruan idiotësi juridike dhe tallet me shqiptarët, se gjoja ka goditur aferën e Portit të Durrësit, ku në fakt ka goditur një marrëveshje të ratifikuar nga Parlamenti, që nuk i nënshtrohet dot më kontrollit kushtetues.”
Reagimi i plotë i Bardhit:
Pyetje për studentët e vitit të parë të drejtësisë: Pajtueshmëria e marrëveshjeve ndërkombëtare me Kushtetutën, kontrollohet nga Gjykata Kushtetuese, para apo pas ratifikimit? Keqardhje për çdo deputet që nënshkruan idiotësi juridike dhe tallet me shqiptarët, se gjoja ka goditur aferën e Portit të Durrësit, ku në fakt ka goditur një marrëveshje të ratifikuar nga Parlamenti, që nuk i nënshtrohet dot më kontrollit kushtetues! Bëni opozitë reale, boll u tallët me shqiptarët. Afera e Portit të Durrësit do të dërgohet padyshim në Gjykatën Kushtetuese sapo të miratohet me forcën e kartonit nga noterët e Qeverisë në Parlament.
