Ish-kryeministri, Sali Berisha ka depozituar këtë të enjte në kryesekretarinë e GJKKO-së kërkesën për përjashtimin e gjyqtares Irena Gjoka.
GJKKO bëri me dije për mediat se kjo kërkesë do të shqyrtohet nga gjyqtarja Flora Hajredinaj.
Këtë të enjte pritet të zhvillohet seanca e radhës për rivlerësimin e masës së sigurisë për ish-kryeministrin. Gjykata ka caktuar avokatët kryesisht Rabie Cenalia dhe Jalldiz Kastrati për procesin ndaj Berishës.
Njoftimi
Në kryesekretarine e GJKKO-së, ditën e sotme, datë 26.10.2023, ora 09:45, është paraqitur kërkesa e kërkuesit Sali Berisha, me objekt: “Kërkohet përjashtimi i gjyqtares Irena Gjoka”, nga gjykimi i kërkesës penale të paraqitur nga Prokuroria e Posaçme, me objekt marrjen në pyetje të shtetasit nën hetim Sali Berisha, me bazë ligjore nenet 17, 18, 19, 21, 22, 23 të Kodit të Procedurës Penale. Duke qenë se gatishmëria për javën 23.10.2023-29.10.2023, referuar urdhërit të gatishmërisë të zv.Kryetares së gjykatës, i takon gjyqtares Irena Gjoka, kjo kërkesë i ka kaluar për shqyrtim gjyqtares pasardhëse të gatishmërisë, Flora Hajredinaj.
