Kryetari i Partisë Demokratike, Sali Berisha u shpreh se bashkë drejtuesi i fushatës së Donald Trump, Chris LaCivita-s që zgjodhi të drejtojë edhe atë të selisë blu për zgjedhjet e 11 Majit zgjodhi PD-në mes shumë kërkesave që vijnë nga e gjithë bota.
“Çdo shqiptar duhet ta ketë të qartë se Chris LaCivita në qindra kërkesa në të gjithë planetin që ekzistojnë për të bashkëpunuar me atë, ai fisnikërisht zgjodhi Partinë Demokratike të Shqipërisë”, tha Berisha.
Kryedemokrati u shpreh se LaCivita-s është ndër të tjera edhe kryetari i Komitetit Kombëtar Republikan. Sipas tij, deklaratat e LaCivita-s ishin të qarta dhe se ai ka ardhur këtu për të vazhduar betejën që fitoi në SHBA kundër George Soros dhe ekstremit të majtë.
“Ai personi të cilin Edi Rama e quajti punëtor i Donald Trump sikur të ishte lulishtar apo kopshtar në Mar-a-Lago është kryetari i Komitetit Kombëtar të Partisë Republikane të Donald Trump. Ai foli aty në cilësinë e bashkëkryetarit të menaxhimit të fushatës më të suksesshme në histori por edhe në cilësinë e kryetarit të Komitetit Kombëtar Republikan. Për kryetarin e Komitetit Kombëtar republikan dhe Partinë Republikane që ai përfaqëson, Edi Rama është një kukull e George Soros. Ai që ta kemi shumë të qartë erdhi këtu për të vazhduar betejën që fitoi në Shtetet e Bashkuara kundër George Soros dhe ekstremit të majtë të tij. Pra ishte një akt kryekëput politik pasi i prenë kokën gjarprit në Uashington, duan t’ia presin tentakulat, kudo dhe në Shqipëri ato ishin dhe janë më të zhvilluara se në asnjë vend tjetër”, tha Berisha.
