Kryetari i Partisë Demokratike, Sali Berisha në konferencën e fundvitit me gazetarët bëri një bilanc të vitit 2024, duke thënë se ky ishte viti i ngritjes së fuqishëm të opozitës.
Sipas tij gjatë 2024 krahas qëndresës të opozitës, u karakterizua gjithashtu si viti i mbështetjes ndërkombëtare më të fuqishme për opozitën.
Ish kryeministri Berisha gjithashtu thotë se ky ishte edhe viti i burgosjeve politike.
Kyredemokrati tha se opozita faktoi me dokumente në mënyrë të pakundërshtueshme, sipas tij- aferat më të mëdha korruptive.
“Së pari, edhe njëherë një urim të përzemërt për vitin që vjen dhe duhet të theksoj se viti 2024 ishte viti i zhvillimeve shumë të rëndësishme për Shqipërinë dhe shqiptarët.
Para së gjithash ky ishte viti i ngritjes së fuqishme të opozitës shqiptare, dështimit të plotë dhe përfundimtar të grushtit shqiptar për eliminimin e opozitës dhe realizimin e projektit ‘Shqipëria pa opozitë’, Shqipëria e regjimit të Edi Ramës.
Por ky vit, krahas qëndresës të pamposhtur të opozitës, u karakterizua gjithashtu si viti i mbështetjes ndërkombëtare më të fuqishme për opozitën dhe denoncimit tashmë publik nga të gjitha forcat politike të qendrës së djathtë në botë i regjimit të Edi Ramës si narkodiktaturë apo si konglomerat i shtetit me krimin.
Si regjim ku zgjedhjet janë shndërruar në fasadë, ku korrupsioni ka kufi vetëm qiellin.
Po të kemi parasysh situatën ku ndodhej Shqipëria, mund t’u them se këto janë arritje epokale, arritje jashtëzakonisht të mëdha për opozitën.
Natyrisht ky ishte viti i burgosjeve politike, dëshmi e asaj që bastardi i xhelatit Kristaq Rama ndan të njëjtin botëkuptim për pluralizmin dhe kundërshtarët politikë njëlloj me të atin që i varte ata në litar.
Por ky ishte viti, se viti ishte i opozitës, të themi atë që është, ky ishte viti në të cilin opozita faktoi me dokumente në mënyrë të pakundërshtueshme aferat më të mëdha korruptive të Edi Ramës dhe organizatës së tij kriminale, djegësave, sterilizatorëve dhe në mënyrë të veçantë aferën e Portit të Durrësit.
Ky ishte viti në të cilin opozita ia doli, sado që hasi rezistencë të madhe, të paraqesë para shqiptarëve dhe botës, Skrapin e partisë si një organizatë kriminale të drejtuar nga Altin Dumani”,-tha Berisha.
