Ish-kryeministri Sali Berisha duke theksuar se nuk pranon kurrë kushtin e Ramës për reformën në drejtësi, që vetingun e gjyqtarëve e prokurorëve ta bëjnë të huajt, deklaroi se ishte opozita ajo që e shpëtoi këtë reformë.
Ai akuzoi kryetarin e komisionit, Fatmir Xhafaj, duke e etiketuar si bashkëkryetari i Partisë Komuniste, të Drejtësisë se hartoi draftet që ktheu mbrapsht Venecia. “Ky skenar ogurzi ishte shkaku i përjashtimit të opozitës, në një kohë kur opozita ofronte pjesëmarrjen e saj, ishte Kryeministri ai që refuzonte në mënyrë kategorike dhe u thoshte të huajve se fjala konsensus në fjalorin e shqiptarëve nuk ekziston. Opozita shpëtoi reformën. Opozita e kuptoi se Edi Rama me reformën nënkupton kthetrat e tij të zeza mbi drejtësinë. Drafti që përgatiti bashkëkryetari i partisë komuniste të Drejtësisë Fatmir Xhafaj, shkoi në Venecia dhe Venecia e hodhi poshtë në 38 nene. Këta janë shakaxhinjtë e reformës. U kthyen vendimet e Venecias. E drejta kaloi në anën e opozitës, po këta s’dinë ç’është e drejta”, tha Berisha.
Por, gjatë replikës, Xhafaj I quajti gënjeshtra deklaratat e Berishës. “Asgjë nuk ka rrëzuar Venecia, ka bërë rekomandime dhe janë reflkektuar dhe y është një process normal, ndasj shkuam atje, Po turp keni? Po ligsht nuk ndiheni, po Kushtetuta që keni sot ka 31 pozicione kushtetuese që i miraton ky parlament, kryeprokurori, KLD, etj dhe me kuorum me 36 vota pro, me kaq bëhesh kryeprokuror e me radhë. Arithmetikë dini ju, ju sa thatë që 65 mandate, apo 60 po deshe ti nuk është 84 që bëjnë 3/5, si ta kapi Rama a ma shpjegoni” tha Xhafaj.
