Ndonëse ende nuk ka paraqitur një platformë konkrete të planit të tij për Tiranën, kandidati i PD, Roland Bejko ka ironizuar premtimet e rivalit të koalicionit “Bashkë Fitojmë, Belind Këlliçi. Në takimin me kandidatët për këshillin bashkiak në kryeqytet, Bejko tha se ka një plan ambicioz që do të ndihmoj qytetarët.
“Projekti ynë për Tiranën nuk është projekt momental, për të zgjidhur një kanal, një mbikalim apo nënkalim, apo për të zgjidhur thjesht biletat e autobusit, nëse do të jenë falas ose me para. Nuk është thjesht një program për të zgjidhur çështjet komunale apo administrative, apo thjesht afrimin e shërbimeve, por është një vizion shumë herë më i madh, shumë herë më ambicjoz. Programi ynë ka një synim shumë të rëndësishëm për të ardhmen e Tiranës”,-tha Bejko.
Sipas Bejkos, 70 % e qytetarëve në Tiranë refuzojnë klasën aktuale politike, duke u shprehur optimist për fitorene tij më 14 maj.
“Janë mbi 70 për qind e qytetarëve shqiptarë që refuzojnë klasën e korruptuar politike, e cila përfaqësohet nga trekëndëshi Rama, Berisha, Meta. Në këto kushte përballë tyre, ne jemi të ndryshmit e tyre. Ata të cilët janë mërzitur me Erion Veliajn, por edhe ata të cilët nuk duan marrjen e bashkisë nga ana e Sali Berishës dhe Ilir Metës, e kanë rrugën e zgjidhjes mbi tavolinë, e kanë në kutinë e votimit. Mjafton vota e tyre dhe të tre këta eliminohen. Eliminohet Erion Veliaj, eliminohen Sali Berisha dhe Ilir Meta dhe fiton kandidati i Partisë Demokratike, nëse duan realisht që t’i përzënë dhe të mos i pranojnë”,-tha Bejko.
Kandidati i PD tha se është alternativa më e mirë për drejtimin e Tiranës, pasi nuk akuzohet për afera korruptive.
