Presidenti Bajram Begaj, u bëri thirrje liderëve botërorë për një përgjigje të unifikuar ndaj sfidave globale dhe për bashkëpunim e dialog përballë konflikteve.
Gjatë një interviste në Forumin Botëror të mbajtur në Baku, Presidenti evidentoi shqetësimet dhe sfidat më të cilat po përballemi dhe paraqiti vizionin për kapërcimin e tyre.
“Vërtet, jemi duke jetuar në kohëra të paprecedenta. Po ndodhin shumë gjëra. Ne përballemi me pasiguri politike, pabarazi ekonomike, ndryshime klimatike, sfidat shëndetësore dhe, sigurisht, probleme me arsimin. Po ashtu, përballemi me padrejtësi sociale. Megjithatë, sfidat me të cilat po përballemi nuk mund të zgjidhen në mënyrë individuale apo rajonale. Ashtu siç kemi mësuar nga e kaluara, duhet të jemi të bashkuar në reagimin tonë”, tha Begaj.
Diskutimet në forum trajtuan çështjen e paqes, veçanërisht në kontekstin e konflikteve globale që po vazhdojnë. Presidenti Begaj, duke e cilësuar rajonin e Ballkanit Perëndimor “tejet i brishtë,” foli për rëndësinë jetike të paqes.
“Paqja është e paçmueshme. Mund të bëjmë çdo gjë për të rritur kapacitetet tona që të sigurojmë më shumë stabilitet në kontinentin tonë. Sigurisht, unë vij nga një rajon ‘tejet i brishtë’,” u shpreh ai.
Gjithashtu, Begaj reflektoi mbi implikacionet më të gjera të bisedimeve në forum, duke konfirmuar angazhimin e Shqipërisë për mbështetjen e nismave që përputhen me vlerat humane.
“Kemi mbështetur çdo iniciativë që lidhet me vlerat humane, sepse me to duhet të bashkëjetojmë,” deklaroi ai.
Forumi i 11-të Global në Baku, me diskutimet e tij të gjera dhe praninë e liderëve globalë, ka hapur rrugën për më shumë bashkëpunim ndërkombëtar.
