Ditën e djeshme presidenti Ilir Meta anuloi datën e zgjedhjeve lokale, e cila më herët ishte dekretuar më 30 qershor.
Ky vendim i marrë në kushtet e një ngërçi politik në vend, ka tërhequr vëmendjen e mediave ndërkombëtare.
BBC shkruan se presidenti i Shqipërisë ka anuluar zgjedhjet vendore, në mes të protestave të shumta të zhvilluara.
Në artikullin e saj shkruhet; “Grupet e opozitës e akuzojnë kryeministrin Edi Rama për mashtrime zgjedhore, për vjedhje votash. Ata duan që të ketë një qeveri kalimtare dhe kanë refuzuar çdo dialog me kryeministrin. Lulzim Basha, kreu i Partisë Demokratike të opozitës, u ka bërë thirrje turmave të vazhdojnë protestat derisa z. Rama të largohet”, shkruan ndër të tjera prestigjiozja BBC.
Meta e argumentoi vendimin e tij duke u shprehur se situata politike në vend është e tensionuar dhe prandaj zgjedhjet nuk mund të mbahen më datë 30 qershor.
Ndërkohë, pavarësisht anulimit të datës së zgjedhjeve, kreu i Partisë Demokratike u tha ditën e djeshme protestuesve se nuk do të ndalen me shtyrjen e zgjedhjeve, por derisa të largohet kryeministri Edi Rama.
Nga ana tjetër, Rama tha pas vendimit të presidentit se ky ishte një skenar i pritshëm, duke theksuar se zgjedhjet do të zhvillohen më 30 qershor./ Opinion.al E.Xh.
