Trashëgimia është e rëndë. Sepse, pavarësisht nga kritikat, mbi të gjitha në sezonin e fundit pas momentit që deklaroi lamtumirën, Bayern Munich i drejtuar nga Pep Guardiola ka fituar diçka! Tre tituj në tre kampionate me trajnerin gjerman në stol, i fundit shënoi edhe një rekord sepse asnjë skuadër në Bundesligë nuk e kishte fituar kampionatin katër herë radhazi.
Megjithatë, fillimi nuk ka qenë i keq për Carletto Ancelotti duke qenë se emri i trajnerit të ardhshëm të Bayern Munich është përmendur edhe gjatë takimit të kryeministrit italian Matteo Renzi me kancelarin gjermane Markel. “Angela është një tifoze e madhe e Bayern, që vitin e ardhshëm do të drejtohet nga italiani Ancelotti, nuk ka shembull më të mirë që fatet e Italisë dhe Gjermanisë janë së bashku. Fitojmë ose humbasim së bashku,” – tha Renzi.
Transformimi i Bayern është i pashmangshëm. Do të nisë nga futbollistët, fytyra të reja, për një projekt ndryshe. Carletto ka nisur punën, edhe me telefonin e tij për merkaton e verës. Mes miqve të vjetër dhe basteve të reja, Ancelotti kërkon të ndërtojë shpinën kurizore të Bayern, një mbrojtës, një mesfushor qendre dhe një sulmues me peshë, duke parë se Lewandowski është një hap larg kalimit te Real Madrid.
Higuain dhe Pjanic janë emrat e preferuar në Serie A, ndërsa objektivi më i madh do të jetë Luka Mordic i Real Madrid. Me spanjollët do të flitet edhe për Raphael Varane, për të përmirësuar një mbrojtje që ka zhgënjyer, sidomos në Champions League. Lajmin e ka bërë të ditur “Le Parisien” që shkruan se bavarezët do të shpenzojnë 40 milionë euro për francezi.
Shtypi gjerman ka përmendur edhe emrat e Dybala, Bale dhe Kroos, për të cilin do të ishte një rikthim në Gjermani. Ajo që është e sigurt është se Bayern ka dëshirë të dominojë në Europë sepse nuk i mjafton më titulli në Bundesligë. Drejtuesit bavarezët kanë hapur portofolin dhe ia kanë treguar trajnerit italian duke i thënë: “Fito Champions League!”. Ancelotti, nga ana e tij, e di shumë mirë si bëhet diçka e tillë.
