Këtë javë, ylli i Bayern-it, Douglas Costa, befasoi duke thënë hapur se e ardhmja e tij mund të mos jetë skuadra bavareze. “Kam marrë disa oferta të majme nga Kina dhe nga disa klube të mëdha në Evropë. Kur sezoni të përfundojë, do të ulemi dhe do të analizojmë gjithçka”, – u shpreh braziliani. Sot qe radha e trajnerit Carlo Ancelotti, që të jepte mendimin e tij mbi këtë çështje. “Nuk e kam lexuar intervistën, por flas me të çdo ditë. Ai është i lumtur”, – tha italiani.
Don Carlo, faktikisht, foli në konferencën për shtyp në kuadër të ndeshjes së Kupës me Wolfsburg-un, por u detyrua të përgjigjej më shumë për mesfushorin, se për sfidën e nesërme. “Ka shumë faktorë që ndikojnë, por për mua vlen vetëm mendimi i lojtarit. Kjo intervistë është kontrolluar më tepër nga agjenti, se sa nga lojtari”, – shtoi 57-vjeçari. Costa nuk ndihet mirë sidomos sepse po vuan të gjejë vend në 11-shin e titullarëve, siç tha ai vetë në “Bild”.
