Komisioni Evropian tha të premten se kishte miratuar një paketë ndihme prej 118 milionë euro (130 milionë dollarë) për të mbështetur Autoritetin Palestinez.
Komisioni tha se shuma do të ndihmojë në pagimin e pagave dhe pensioneve të nëpunësve civilë në Bregun Perëndimor, ndihmat sociale për familjet në nevojë dhe pagesën për referimet mjekësore në spitalet e Jerusalemit Lindor.
BE-ja është gjithashtu e gatshme të vazhdojë të ndihmojë Autoritetin Palestinez në një afat më të gjatë, tha presidentja e komisionit Ursula von der Leyen.
“Ne po reflektojmë për një paketë më të gjerë afatmesme për vitin e ardhshëm për të kontribuar në stabilitetin ekonomik dhe politik të Gazës dhe Bregut Perëndimor, pasi kushtet të lejojnë në terren, si pjesë e përpjekjeve më të gjera ndërkombëtare për të rivendosur një zgjidhje me dy shtete. ”, tha von der Leyen në një deklaratë.
Për vitin 2024, BE ka lënë mënjanë gjithashtu 125 milionë euro ndihmë humanitare për njerëzit në rripin e rrethuar të Gazës, ku komisioneri i BE-së Josep Borrell tha se mungesat e ushqimit kishin arritur nivele të paprecedentë.
“Ky është një zhvillim i rëndë dhe duhet të jetë një thirrje zgjimi për të gjithë botën që të veprojë tani për të parandaluar një katastrofë vdekjeprurëse njerëzore”, tha kryediplomati i BE-së.
“Ndihma duhet të arrijë tek ata në nevojë përmes të gjitha mjeteve të nevojshme, duke përfshirë korridoret humanitare dhe pauzat për nevoja humanitare.”/Opinion.al
