Vijon të mbetet e tensionuar situata në Shkodër.
Ditën e sotme kryetarja e Bashkisë Voltana Ademi ka qenë në dyert e KZAZ numër 3 ku ka kërkuar edhe lirimin e saj në përputhje me dekretin e Presidentit Meta.
Pas debatit me forcat e drejtorisë së policisë, kryebashkiakja ka bërë të ditur se Bashkia Shkodër ka bërë një padi penale kundër drejtorisë së policisë Shkodër, drejtorit të policisë Shkodër dhe KQZ me objekt ‘shpërdorim detyre’, ‘kryerja e funksionit pas dhënies fund të tij’, ‘kryerja e veprimeve arbitrare’, ‘mosmarrja e masave për të ndërprerë gjendjen e paligjsheme’, ‘përvetësim i titullit apo i detyrës shtetërore’ dhe ‘dhunim i institucioneve shtetërore’.
Këto padi Bashkia Shkodër i ka ngritur pas protestës së djeshme ku mbështetës të Partisë Demokratike u përplasën me efektivët e policisë për të mos lejuar zhvillimin e mitingut elektoral të PS.
Gjithashtu Ademi shtoi se shkolla ‘Shejnazi Uka’ nuk i përmbush kushtet për të qenë KZAZ. Ajo tha se godinat e përshtatshme për KZAZ duhet të përmbushin disa standarde. Kështu që vendosja e materialeve zgjedhore aty është në kundërshti me ligjin. /Opinion.al
